اسلام آباد: موجودہ مالی سال کے پہلے پانچ ماہ کے دوران برطانیہ میں کام کرنے والے پاکستانیوں کی ترسیلات زر میں نمایاں اضافہ ریکارڈ کیا گیا ہے۔ اسٹیٹ بینک آف پاکستان کے جاری کردہ تازہ اعدادوشمار کے مطابق جولائی سے نومبر 2025 تک برطانیہ سے موصول ہونے والی ترسیلات کا مجموعی حجم 2.348 ارب ڈالر رہا، جو گزشتہ مالی سال کی اسی مدت کے 2.182 ارب ڈالر کے مقابلے میں 8 فیصد زیادہ ہے۔ یہ اضافہ بیرون ملک مقیم پاکستانیوں کے ملک میں بڑھتے اعتماد اور مستحکم ترسیلاتی رجحان کی عکاسی کرتا ہے۔
مزید تفصیلات کے مطابق نومبر 2025 میں برطانیہ سے ترسیلات زر کا حجم 481 ملین ڈالر ریکارڈ کیا گیا۔ یہ رقم اکتوبر کے 499 ملین ڈالر کے مقابلے میں 4 فیصد کم ہے، تاہم گزشتہ سال نومبر کے 410 ملین ڈالر کے مقابلے میں 17 فیصد زیادہ رہی، جو سالانہ بنیادوں پر مضبوط کارکردگی ظاہر کرتی ہے۔
رپورٹ میں یہ بھی بتایا گیا کہ مالی سال کے پہلے پانچ ماہ میں سمندر پار پاکستانیوں کی مجموعی ترسیلات زر 16.145 ارب ڈالر تک پہنچ گئیں، جو گزشتہ مالی سال کی اسی مدت کے 14.766 ارب ڈالر کے مقابلے میں 9 فیصد زیادہ ہیں۔ معاشی ماہرین کے مطابق ترسیلات میں یہ اضافہ زرمبادلہ کے ذخائر میں بہتری اور بیرونی شعبے کے اعتماد میں اضافے کی علامت ہے۔
