اسلام آباد: فیڈرل بورڈ آف ریونیو نے ایف بی آر نان فائلرز فہرست کو حتمی شکل دیتے ہوئے ایک لاکھ 74 ہزار نان فائلرز کی نشاندہی کر لی ہے۔ حکام کے مطابق ان افراد کو آن لائن ذرائع کے ساتھ ساتھ گھروں پر بھی نوٹسز ارسال کیے جا رہے ہیں تاکہ انہیں ٹیکس قوانین کی پابندی پر آمادہ کیا جا سکے۔
ایف بی آر حکام کا کہنا ہے کہ لاہور، راولپنڈی، ملتان اور فیصل آباد سے تعلق رکھنے والے نان فائلرز کو شناختی کارڈ کی بنیاد پر منتخب کیا گیا ہے۔ ان تمام افراد کو ہدایت دی جا رہی ہے کہ وہ مقررہ مدت میں اپنے ٹیکس معاملات کو درست کریں اور واجب الادا گوشوارے جمع کرائیں۔
بڑے شہروں کے نان فائلرز نشانے پر
ذرائع کے مطابق فہرست میں شامل نان فائلرز کی ملکیت میں گاڑیاں، رہائشی مکانات، پلاٹس اور قابلِ ذکر نقد رقوم موجود ہیں۔ نوٹس میں واضح کیا گیا ہے کہ نان فائلرز نوٹس موصول ہونے کے ایک ہفتے کے اندر تین سال کے ٹیکس ریٹرن جمع کرائیں، بصورت دیگر ان کے خلاف قانونی کارروائی عمل میں لائی جائے گی۔
حکام کے مطابق جو افراد ازخود ٹیکس ریٹرن جمع کرائیں گے، ان کی فراہم کردہ معلومات کو مستند تصور کیا جائے گا اور ان کے خلاف سخت کارروائی نہیں کی جائے گی۔ ایف بی آر کی نان فائلرز فہرست میں گھریلو خواتین کے نام بھی شامل ہونے کی تصدیق کی گئی ہے۔
