میسجنگ ایپ واٹس ایپ نے ایک نیا فیچر “ریسنٹ ہسٹری شیئرنگ” ٹیسٹ کرنا شروع کر دیا ہے، جس کے تحت گروپ میں نئے شامل ہونے والے ممبرز کو ان کی شمولیت سے پہلے بھیجے گئے پیغامات دیکھنے کی سہولت ملے گی۔ یہ فیچر اینڈروئیڈ بیٹا ورژن 2.25.36.11 میں سامنے آیا ہے۔
اس اپ ڈیٹ کے مطابق، جب کوئی صارف کسی گروپ میں شامل ہوگا—خواہ اسے ایڈ کیا جائے یا وہ لنک سے جوائن کرے—تو اسے تقریباً گزشتہ 24 گھنٹوں کے پیغامات خودکار طور پر نظر آئیں گے۔ تیز رفتار گروپس میں پیغامات کی تعداد کو زیادہ سے زیادہ 1000 میسجز تک محدود رکھا جائے گا تاکہ ڈیٹا استعمال اور ڈیوائس پرفارمنس متاثر نہ ہو۔
گروپ ایڈمنز کے پاس یہ اختیار بھی ہوگا کہ اس فیچر کو آن یا آف رکھیں، تاکہ گروپ کی نوعیت کے مطابق گفتگو کا کنٹرول برقرار رکھا جا سکے۔
سوشل گروپس میں رابطہ مزید آسان ہوگا
پرائیویسی کے حوالے سے واٹس ایپ نے واضح کیا ہے کہ یہ تمام پیغامات اینڈ ٹو اینڈ انکرپٹڈ رہیں گے۔ جب نیا ممبر گروپ میں شامل ہوگا تو موجودہ ممبران میں سے ایک شخص سیکیور طریقے سے پچھلی چیٹ کو دوبارہ انکرپٹ کرکے اس تک پہنچائے گا۔ یہ پورا عمل پس منظر میں خاموشی سے ہوگا اور گروپ کی موجودہ گفتگو میں کوئی رکاوٹ پیدا نہیں کرے گا۔
فی الحال، نئے ممبرز اکثر گفتگو کے دوران بغیر کسی تناظر کے گروپ میں شامل ہوتے ہیں، جس سے انہیں موضوع یا ذمّہ داری کا اندازہ نہیں ہوتا۔
واٹس ایپ کا یہ نیا فیچر کمیونٹی گروپس، ورک پلیس کوآرڈینیشن، کلاس روم چیٹس، ایونٹ آرگنائزنگ اور سوشل گروپس میں رابطے کو مزید آسان بنائے گا۔
یہ فیچر ابھی ٹیسٹنگ مرحلے میں ہے اور عام صارفین کے لیے دستیاب نہیں۔ کمپنی بتدریج اسے اپنے ٹیسٹرز تک بڑھا رہی ہے تاکہ کارکردگی کا جائزہ لیا جا سکے اور پھر اسے عالمی سطح پر متعارف کرایا جائے۔
