کولمبو: آئی سی سی ویمنز کرکٹ ورلڈ کپ 2025 کے چھٹے میچ میں بھارت نے پاکستان کو 88 رنز سے شکست دیدی۔بھارت کی جانب سے ملنے والے 248 رنز کے ہدف کے تعاقب میں پاکستان کی پوری ٹیم 43 اوورز میں 159 رنز پر ڈھیر ہوگئی، سدرہ امین 81 رنز بناکر نمایاں رہیں، نتالیہ پرویز 33، سدرہ نواز نے 14 رنز بنائے جبکہ دیگر کو کھلاڑی ڈبل فگر میں داخل نہ ہوسکی۔
قبل ازیں کولمبو کے پریما داسا سٹیڈیم میں کھیلے گئے میچ میں پاکستان ویمن ٹیم کی کپتان فاطمہ ثنا نے ٹاس جیت کر بھارت کو بیٹنگ کی دعوت دی، بھارتی ویمنز ٹیم پہلے بیٹنگ کرتے ہوئے مقررہ 50 اوورز میں 247 رنز بناکر پوری ٹیم آؤٹ ہوگئی بھارتی ٹیم کی جانب سے اننگز کا آغاز کرنے والی پراتیکا راول اور سمرتی مندھانا نے بالترتیب 31 اور 23 رنز بنائے جب کہ ہرلین دیول نے 46 رنز کی اننگز کھیلی۔
کپتان ہرمن پریت کور 19، جمیما روڈریگز 32، دیپتی شرما 25، سنہ رانا 20 اور وکٹ کیپر بلے باز رچا گھوش نے 35 رنز کی جارحانہ اننگز کھیلی۔ قومی ویمنز ٹیم کی جانب سے ڈیانا بیگ نے 4 کھلاڑیوں کو پویلین کی راہ دکھائی جب کہ سعدیہ اقبال ، فاطمہ ثنا نے 2،2 اور رامین شمیم، نشرا سندھو نے ایک ایک وکٹ حاصل کی۔
