بیجنگ (سی این پی) روس کے بعد چین، فرانس، ایران، کولمبیا اور کیوبا نے بھی وینزویلا میں امریکی فوجی آپریشن کی شدید مذمت کی ہے۔ چینی حکام کا کہنا ہے کہ امریکا نے ایک خودمختار ملک کے خلاف طاقت کا استعمال کیا جو بین الاقوامی قانون اور وینزویلا کی آزادی پر حملہ ہے، امریکا کو عالمی قوانین اور اقوام متحدہ کے چارٹر کی پاسداری کرنی چاہیے۔
فرانسیسی وزارت خارجہ نے بھی وینزویلا پر امریکی حملے کی مخالفت کرتے ہوئے صدر کی گرفتاری کو عالمی قوانین کی خلاف ورزی قرار دیا اور کہا کہ کسی ملک کے صدر کو ہٹانا اور اس کی آزادی کو نقصان پہنچانا غلط ہے، وینزویلا کا مستقبل صرف وہاں کے عوام ہی طے کر سکتے ہیں۔
ایران نے امریکی کارروائی کو وینزویلا کی قومی خودمختاری اور علاقائی سالمیت کی خلاف ورزی قرار دیتے ہوئے سلامتی کونسل سے فوری اقدام اور ذمہ داران کو جواب دہ بنانے کا مطالبہ کیا، جبکہ کولمبیا اور کیوبا کی قیادت نے بھی مادورو حکومت کے خلاف امریکی کارروائی کی مذمت کی۔
قبل ازیں روس نے وینزویلا کی قیادت کی خودمختاری کے دفاع کی پالیسی کی حمایت جاری رکھنے کا اعادہ کرتے ہوئے کہا تھا کہ لاطینی امریکا کو زون آف پیس رہنا چاہیے اور کشیدگی کم کرنے کے لیے بات چیت ضروری ہے۔ ادھر اقوام متحدہ کے سیکرٹری جنرل نے بھی وینزویلا میں امریکی فوجی کارروائی پر گہری تشویش کا اظہار کرتے ہوئے خبردار کیا کہ ایسی کارروائیاں خطے اور عالمی قانونی نظام کے لیے خطرناک نظیر قائم کر سکتی ہیں۔
