واشنگٹن ڈی سی میں نیشنل گارڈ کے دو اہلکاروں کی ہلاکت کے بعد، امریکی صدر ڈونلڈ ٹرمپ نے ایک بار پھر سخت امیگریشن پالیسیوں کا دروازہ کھول دیا ہے، جس نے امریکہ بھر میں نئی بحث چھیڑ دی ہے۔ واقعے کے بعد ٹرمپ نے ’تھرڈ ورلڈ ممالک‘ سے امیگریشن مستقل معطل کرنے کا اعلان کر دیا۔
امریکی صدر ڈونلڈ ٹرمپ نے اعلان کیا ہے کہ امریکہ میں ’تھرڈ ورلڈ ممالک‘ سے امیگریشن کو مستقل طور پر معطل کیا جا رہا ہے۔ یہ فیصلہ واشنگٹن ڈی سی میں فائرنگ کے اس واقعے کے بعد سامنے آیا جس میں دو نیشنل گارڈ اہلکار مارے گئے تھے۔ حملہ آور ایک افغان شہری تھا جو امریکی فوج کے ساتھ کام کے بعد افغانستان سے امریکہ منتقل ہوا تھا۔
ٹرمپ انتظامیہ—جو پہلے ہی امیگریشن سخت کرنے کے مؤقف کے لیے جانی جاتی ہے—نے غیر شہریوں کے تمام وفاقی فوائد اور سبسڈیز ختم کرنے کا حکم بھی جاری کیا ہے۔ ٹرمپ نے اپنی سوشل میڈیا پلیٹ فارم Truth Social پر لکھا کہ حکومت اب ’غیر قانونی اور بدنظمی پھیلانے والی آبادی‘ میں نمایاں کمی لانے کے لیے اقدامات کرے گی۔
ٹرمپ کے بیان کے اہم نکات یہ ہیں:
- ’تھرڈ ورلڈ ممالک‘ سے امیگریشن کی مستقل معطلی
- غیر شہریوں کے تمام وفاقی فوائد کا خاتمہ
- ایسے تارکینِ وطن کی شہریت منسوخی جو قومی امن کے لیے خطرہ ہوں
- بائیڈن دور میں دی گئی مشتبہ یا غیر قانونی تمام امیگریشن منظوریوں کا خاتمہ
- کسی بھی غیر ملکی کی ملک بدری جو سکیورٹی رسک، معاشی بوجھ یا ’ویسٹرن سیولائیزیشن‘ سے ہم آہنگ نہ ہو
ٹرمپ نے کانگریس رکن الہان عمر پر بھی تنقید کرتے ہوئے انہیں “ملک کی بدترین کانگریس وومن” قرار دیا۔
امریکی حکومت نے ابھی تک یہ واضح نہیں کیا کہ ’تھرڈ ورلڈ ممالک‘ سے ان کی مراد کن ممالک سے ہے۔ تاہم جون میں ٹرمپ انتظامیہ نے 19 ممالک پر سفری پابندی لگائی تھی، جن میں شامل ہیں:
افغانستان، برما، چاڈ، کانگو، ایکویٹوریل گنی، اریٹیریا، ہیٹی، ایران، لیبیا، صومالیہ، سوڈان، یمن، برونڈی، کیوبا، لاؤس، سیرالیون، ٹوگو، ترکمانستان، وینزویلا۔
یہ واضح نہیں کہ یہی ممالک نئے اعلان کا حصہ ہیں یا کوئی نئی فہرست سامنے آئے گی۔
