برسبین: ایشز سیریز کے دوسرے ٹیسٹ میچ میں آسٹریلیا نے انگلینڈکو 8 وکٹوں سے شکست دے کر پانچ میچوں کی سیریز میں 0-2 کی برتری حاصل کر لی۔ اتوار کو چوتھے روز انگلینڈ کی ٹیم اپنی دوسری اننگز میں 241 رنز بنا کر آؤٹ ہو گئی، جس میں کپتان بین سٹوکس 50 اور ویل جیکس 41 رنز بنا کر نمایاں رہے۔
آسٹریلیا کی جانب سے مائیکل نیسر نے شاندار بائولنگ کرتے ہوئے 5 وکٹیں حاصل کیں، جبکہ مچل سٹارک اور سکاٹ بولانڈ نے دو، دو وکٹیں حاصل کر کے انگلش بیٹنگ لائن کو مکمل طور پر ڈسٹرب کر دیا۔ انگلینڈ کی کمزور بائولنگ کے خلاف آسٹریلیا کو جیت کے لیے محض 65 رنز کا ہدف ملا، جسے کینگروز نے صرف 2 وکٹوں کے نقصان پر حاصل کر لیا۔
کپتان سٹیون سمتھ نے ناقابل شکست 23 اور تراوس ہیڈ نے 22 رنز بنا کر ٹیم کو جیت کی جانب لے جا کر اس فتح کو یقینی بنایا۔ انگلینڈ کی جانب سے گس اٹکنسن نے دو کھلاڑیوں کو آؤٹ کیا، لیکن آسٹریلوی بیٹنگ لائن مضبوط رہی۔ مچل سٹارک میچ میں مرد میدان قرار پائے، مجموعی طور پر 8 وکٹیں حاصل کر کے اپنی ٹیم کو اہم فتح دلوائی۔
اس شاندار جیت کے بعد آسٹریلیا نے ایشز سیریز میں انگلینڈ کے خلاف 0-2 کی برتری حاصل کر لی، اور سیریز میں دباؤ انگلش ٹیم پر بڑھ گیا ہے۔
