بھارت میں ڈاکٹروں نے کامیاب آپریشن کے بعد بچے کے معدے سے بالوں کا گچھا اور جوتے کا تسمہ نکال لیا۔ ٹائمز آف انڈیا کے مطابق بھارتی ریاست گجرات کے شہر احمد آباد میں ڈاکٹروں نے سات سالہ بچے کے معدے اور آنتوں سے بالوں کا گچھا، گھاس اور جوتے کا تسمہ کامیابی کے ساتھ نکال لیا۔مدھیہ پردیش کے ضلع رتلام سے تعلق رکھنے والے شبھم کو دو ماہ سے پیٹ میں درد، قے اور وزن میں کمی کی شکایت تھی، مدھیہ پردیش کے ایک نجی ہسپتال میں علاج کے باوجود افاقہ نہ ہونے پر اسے سول ہسپتال احمد آباد منتقل کیا گیا۔
سول ہسپتال میں شبھم کا سی ٹی سکین اور اینڈوسکوپی کی گئی، جس میں معدے اور آنتوں میں غیر معمولی گچھے کی موجودگی کا انکشاف ہوا، آپریشن کے دوران ڈاکٹروں کی ٹیم نے ایک پیچیدہ لیپروٹومی کے ذریعے بالوں کا گچھا اور جوتے کا فیتہ کامیابی سے نکال دیا۔ سول ہسپتال احمد آباد کے ڈاکٹر کے مطابق سرجری کے ساتویں دن کئے گئے ڈائی ٹیسٹ سے یہ تصدیق ہوئی کہ بچے کے معدے میں کوئی مواد باقی نہیں رہا، ڈاکٹر نے کہا کہ بچے کو ٹریچوبیزوآر نامی ایک نایاب بیماری تھی، جس میں نگلے گئے بال معدے میں اکٹھے ہو کر سخت گولا بنا دیتے ہیں، اس بیماری کی علامات میں پیٹ کا درد یا پھولنا، متلی یا قے، بھوک میں کمی، وزن میں کمی اور قبض شامل ہیں۔
