پاکستان کے عالمی شہرت یافتہ گلوکار راحت فتح علی خان اور عاطف اسلم نہ صرف اپنے لازوال گانوں بلکہ شاندار اسٹیج پرفارمنسز کے باعث بھی بین الاقوامی سطح پر نمایاں مقام رکھتے ہیں۔ دونوں فنکاروں نے بالی ووڈ فلموں کے لیے گائے گئے سپرہٹ نغمات کے ذریعے خطے بھر میں بے پناہ مقبولیت حاصل کی، جبکہ ان کی آواز آج بھی موسیقی کے شائقین کے لیے کشش کا باعث سمجھی جاتی ہے۔
یہی وجہ ہے کہ نجی تقریبات، شاہانہ شادیوں اور بڑی شخصیات کے ایونٹس میں ان گلوکاروں کی موجودگی ہمیشہ خاص توجہ حاصل کرتی ہے۔ پاکستان میں معروف بزنس ٹائیکون ملک ریاض اور بھارت میں مکیش امبانی جیسے بااثر افراد کی شادیوں میں ان فنکاروں کی پرفارمنسز پہلے ہی خبروں کی زینت بن چکی ہیں، جہاں ان کے معاوضوں پر بھی خاصی بحث ہوتی رہی ہے۔
گزشتہ ہفتے فریال تالپور کی صاحبزادی عائشہ تالپور کی شادی کی تقریبات نے سوشل میڈیا پر خاصی توجہ حاصل کی، جہاں راحت فتح علی خان اور عاطف اسلم نے اپنی آواز کا جادو جگایا۔ باخبر ذرائع کے مطابق دونوں گلوکاروں نے معزز مہمانوں کی خصوصی فرمائش پر اپنے مقبول گانے پیش کیے، جس سے محفل نہایت یادگار بن گئی اور تقریب دیر تک زیرِ بحث رہی۔
ان تقریبات میں ہونے والی پرفارمنسز کے بعد گلوکاروں کے معاوضوں سے متعلق سوالات ایک بار پھر سامنے آئے، جس پر سوشل میڈیا اور شوبز حلقوں میں خاصی چہ مگوئیاں دیکھنے میں آئیں۔
معروف اینکر کے چونکا دینے والے انکشافات
سینئر اینکر پرسن نعیم حنیف نے حالیہ گفتگو کے دوران ان نامور گلوکاروں کی شادیوں میں پرفارمنس کے معاوضوں سے متعلق دلچسپ تفصیلات شیئر کیں۔ ان کے مطابق راحت فتح علی خان پاکستان میں کسی شادی کی تقریب میں پرفارم کرنے کے لیے اوسطاً ایک کروڑ پچیس لاکھ روپے وصول کرتے ہیں، جبکہ کسی دوسرے شہر میں تقریب ہونے کی صورت میں یہ معاوضہ مزید بڑھ جاتا ہے۔ بیرونِ ملک پرفارمنس کے لیے ان کی فیس تقریباً دگنی ہو جاتی ہے۔
نعیم حنیف نے عاطف اسلم کے حوالے سے بتایا کہ وہ طویل عرصے تک شادیوں میں پرفارم کرنے سے گریز کرتے رہے، تاہم تقریباً سات سال قبل ملک ریاض نے انہیں اپنے پوتے کی شادی میں مدعو کیا۔ بظاہر انکار کے لیے عاطف اسلم نے ڈیڑھ کروڑ روپے کا مطالبہ کیا، مگر میزبان نے یہ رقم ادا کر دی، جس کا بل نعیم حنیف کے مطابق انہوں نے خود دیکھا۔ اسی واقعے کے بعد عاطف اسلم نے شادیوں میں پرفارم کرنا شروع کیا اور اب وہ فی تقریب تقریباً دو سے ڈھائی کروڑ روپے معاوضہ لیتے ہیں۔
انہوں نے مزید بتایا کہ معروف صوفی گلوکارہ عابدہ پروین عموماً صحت کے مسائل کے باعث نجی تقریبات میں کم ہی شرکت کرتی ہیں، تاہم اگر وہ کسی تقریب میں پرفارم کریں تو ان کا معاوضہ بھی کم نہیں ہوتا اور وہ تقریباً ساٹھ سے ستر ہزار ڈالر وصول کرتی ہیں۔ نعیم حنیف کے اندازے کے مطابق مذکورہ شادی میں مجموعی طور پر گلوکاروں کی پرفارمنس پر ہونے والا خرچ تقریباً سات کروڑ روپے کے قریب تھا۔
