واشنگٹن نے بھارت کے لیے جدید دفاعی سازوسامان کی خریداری کی منظوری دیتے ہوئے FGM-148 جویلن ٹینک شکن میزائل سسٹم اور M982 ایکس کیلیبر گائیڈڈ توپ کے گولے فروخت کرنے کی منظوری دے دی ہے۔ امریکہ کی ڈیفنس سکیورٹی کوآپریشن ایجنسی نے اس مجوزہ معاہدے کے بارے میں باضابطہ طور پر کانگریس کو آگاہ کر دیا ہے۔
ایجنسی کے مطابق دونوں ہتھیاروں کی مجموعی مالیت تقریباً 93 ملین ڈالر ہے، جس میں 47 ملین ڈالر کے ایکس کیلیبر پروجیکٹائل اور 46 ملین ڈالر کے جویلن میزائل سسٹم شامل ہیں۔ امریکی ادارے کا کہنا ہے کہ یہ ہتھیار بھارت کی فوج کو درست نشانہ لگانے کی صلاحیت میں اضافہ کریں گے اور اسے موجودہ و مستقبل کے خطرات سے نمٹنے میں مضبوط بنائیں گے۔
واشنگٹن اور نئی دہلی اس پیشرفت کو امریکا۔بھارت اسٹریٹجک دفاعی تعاون کے نئے مرحلے کے طور پر دیکھ رہے ہیں۔
