زیورخ: خواتین فٹبال میں جاری عالمی مقابلے ایک نئے موڑ پر پہنچ گئے ہیں، اور تازہ فیفا رینکنگ نے طاقت کے اس بدلتے توازن کو مزید نمایاں کر دیا ہے۔ اسپین، جو حالیہ مہینوں میں شاندار کھیل پیش کر رہا ہے، نہ صرف نیشنز لیگ کا ٹائٹل جیت چکا ہے بلکہ دسمبر کی فیفا ویمنز ورلڈ رینکنگ میں بھی اپنی حکمرانی برقرار رکھنے میں کامیاب رہا ہے۔
چار ماہ تک جاری رہنے والے براعظمی ٹورنامنٹس اور ورلڈ کپ کوالیفائرز کے بعد درجہ بندی میں بڑی تبدیلیاں سامنے آئی ہیں۔ اسپین، جس نے اگست میں پہلی پوزیشن حاصل کی تھی، مسلسل متاثرکن کھیل کی بدولت بدستور نمبر ون ہے۔ دوسری جانب امریکہ اپنی روایتی مضبوط پوزیشن پر قائم ہے اور اس بار بھی دوسری رینک برقرار رکھنے میں کامیاب رہا۔
جرمنی کی ٹیم تیسرے نمبر پر پہنچ گئی
نیشنز لیگ کی فائنلسٹ جرمنی نے متوازن اور جارحانہ کھیل کا مظاہرہ کرتے ہوئے دو درجے ترقی حاصل کی اور تیسرے نمبر پر پہنچ گئی، حالانکہ فائنل میں اسپین سے شکست کا سامنا کرنا پڑا۔ سویڈن سیمی فائنل میں اسپین کے ہاتھوں ہارنے کے بعد پانچویں نمبر پر آ گیا اور دو درجے پیچھے ہٹا، جبکہ فرانس اور کینیڈا نے ایک ایک پوزیشن کھو دی۔
درجہ بندی میں مثبت پیش رفت کرنے والوں میں برازیل شامل ہے، جو فیفا ویمنز ورلڈ کپ 2027 کی میزبان ہونے کے باعث پہلے ہی عالمی توجہ حاصل کر چکا ہے۔ برازیل ایک درجہ اوپر آ کر چھٹی پوزیشن پر پہنچ گیا، جبکہ شمالی کوریا بھی مستقل کارکردگی کے باعث نویں نمبر پر آ گیا۔
تین ٹیموں کی حیران کن 16-16 درجے ترقی
دنیا کے مختلف خطوں سے تین ٹیموں نے حیران کن 16-16 درجے ترقی حاصل کی، جن میں نکاراگوا، برکینا فاسو، اور امریکن سموآ شامل ہیں۔ امریکن سموآ نے کوک آئی لینڈز اور ٹونگا کے خلاف فتح سمیٹ کر سب سے زیادہ رینکنگ پوائنٹس حاصل کیے اور نمایاں طور پر آگے بڑھی۔
منفی تنزلی میں پیراگوئے پانچ درجے نیچے آ کر سب سے زیادہ نقصان اٹھانے والی ٹاپ 50 ٹیم ثابت ہوئی۔ اسی طرح مالی اور مصر چھ چھ درجے نیچے گئے۔ بھارت، کیمرون اور سولومن آئلینڈز نے بھی چار چار پوزیشنیں کھو دیں۔
دو نئی افریقی ٹیموں نے پہلی بار رینکنگ میں جگہ بنائی
اس اپ ڈیٹ میں دو نئی افریقی ٹیموں چاڈ اور لیبیا نے پہلی بار فیفا ویمنز رینکنگ میں جگہ بنائی، جس کے بعد ویمنز رینکنگ میں شامل فیفا ممبر ایسوسی ایشنز کی تعداد بڑھ کر 198 کے نئے ریکارڈ تک پہنچ گئی ہے۔ دوسری جانب پولینڈ، وینزویلا، کابو وردے اور سعودی عرب اپنی تاریخ کی بلند ترین رینکنگ پر پہنچنے میں کامیاب ہو گئے ہیں۔
