لندن (سی این پی): ملکہ برطانیہ کمیلا نے انکشاف کیا ہے کہ کم عمری میں انہیں ٹرین میں سفر کے دوران ایک اجنبی شخص کی جانب سے ہراسانی کا سامنا کرنا پڑا تھا۔ بی بی سی ریڈیو کو انٹرویو دیتے ہوئے ملکہ کمیلا نے نوجوانی میں پیش آئے واقعے کا ذکر کیا۔
انہوں نے بتایا کہ وہ ایک دن ٹرین میں سفر کے دوران کتاب پڑھ رہی تھیں کہ اس دوران ٹرین میں موجود ایک اجنبی شخص نے اچانک ان پر حملہ کر دیا اور انہیں ہراساں کرنا شروع کر دیا۔ ملکہ کے مطابق اس وقت انہوں نے اپنی والدہ کی نصیحت یاد رکھی اور حاضر دماغی کا مظاہرہ کرتے ہوئے جوتا اتار کر اس شخص کو دے مارا اور مزاحمت کے بعد ٹرین سے اتر گئیں، اس وقت ان کی عمر 16 یا 17 سال تھی اور یہ واقعہ کئی سالوں تک ان کے لیے صدمے کا باعث بنا رہا۔
کوئین کمیلا کا مزید کہنا تھا کہ جب بھی کوئی گھریلو تشدد کے موضوع پر بات کرتا ہے تو انہیں یہ واقعہ یاد آ جاتا ہے جو انہیں بہت پریشان کرتا ہے۔
