اسلام آباد: وزیر داخلہ محسن نقوی سے تبلیغی جماعت کے اکابرین کے وفد نے ملاقات کی۔وفد میں انوار غنی، اقبال میاں، محمد عامر اور زاہد پراچہ شامل تھے، ہفتہ کو وزارت داخلہ سے جاری بیان کے مطابقتبلیغی جماعت کے وفد نے وزیر داخلہ محسن نقوی کو نومبر میں ہونے والے سالانہ تبلیغی اجتماع کی تیاریوں سے متعلق آگاہ کیا۔
وزیر داخلہ محسن نقوی نے تبلیغی جماعت کے اکابرین کے وفد سے گفتگو کرتے ہوئے کہا کہ وزارت داخلہ کی جانب سے اجتماع کے انعقاد کے سلسلے میں ہر ممکن تعاون فراہم کیا جائے گا، اجتماع میں شرکت کیلئے آنےوالے غیر ملکی وفود کو ویزا کے حصول میں مکمل سہولت فراہم کی جائے گی اورگزشتہ سال کی طرح اس سال بھی ائیر پورٹس پر سپیشل کاؤنٹر قائم کئے جائیں گے۔
انہوں نے کہا کہ دین اسلام کی تبلیغ کیلئے سہولت اور آسانی فراہم کرنا ہمارا فرض ہے اور ثواب کا کام ہے۔ ملاقات کے آخر میں سیلاب زدگان اور ملکی ترقی وسلامتی کیلئے خصوصی دعا کی گئی۔ وزیر مملکت برائے داخلہ طلال چوہدری، چیف کمشنر اسلام آباد اور آئی جی اسلام آباد پولیس بھی اس موقع پر موجود تھے۔
