کولمبو — سری لنکا کے خلاف تین میچز کی ٹی ٹوئنٹی سیریز کے لیے پاکستانی قومی سکواڈ کے دونوں گروپ کولمبو پہنچ گئے ہیں۔ پہلے گروپ میں شاداب خان، فہیم اشرف، محمد وسیم جونئیر اور سلمان مرزا شامل ہیں، جبکہ دوسرے گروپ میں کپتان سلمان علی آغا کے ساتھ محمد نواز، صاحبزادہ فرحان، عثمان خان، صائم ایوب، ابرار احمد، عبدالصمد اور خواجہ نافع شامل ہیں۔
ٹی ٹوئنٹی اسکواڈ کے ساتھ ہی ہیڈ کوچ مائیک ہیسن، باؤلنگ کوچ ایشلے نوفکی، فیلڈنگ کوچ اور دیگر سپورٹ سٹاف بھی کولمبو پہنچ گئے ہیں۔ نسیم شاہ، فخر زمان اور عثمان طارق، جو آئی ایل ٹی ٹوئنٹی لیگ میں حصہ لے رہے تھے، نے بھی سکواڈ کے ساتھ جوائن کر لیا ہے۔
کپتان سلمان علی آغا کل شام نیوز کانفرنس کریں گے اور ٹیم کل رات پریکٹس سیشن میں حصہ لے گی۔ کھلاڑیوں کی آمد کے بعد انتظامیہ نے سیریز کی تیاری کو حتمی شکل دینے کے لیے پریکٹس، اسٹراٹیجی اور فیلڈنگ سیشنز کا آغاز کر دیا ہے۔
سری لنکا کے ساتھ تین ٹی ٹوئنٹی میچ دمبولا میں کھیلے جائیں گے، پہلا میچ سات جنوری، دوسرا نو جنوری اور آخری میچ گیارہ جنوری کو ہوگا۔ پاکستانی ٹیم کی تیاری اور اسکواڈ کی تفصیلات شائقین کرکٹ کے لیے دلچسپی کا باعث ہیں اور توقع کی جا رہی ہے کہ یہ سیریز انتہائی مقابلے کا حامل ہوگی۔
