آئی سی سی مینز ٹی ٹوئنٹی ورلڈ کپ 2026 سے قبل پاکستان کرکٹ بورڈ نے آسٹریلوی ٹیم کے دورۂ پاکستان کی باضابطہ تصدیق کر دی ہے، جسے دونوں ٹیموں کی تیاریوں کے لیے انتہائی اہم قرار دیا جا رہا ہے۔ اس دورے کے دوران پاکستان اور آسٹریلیا کے درمیان تین میچز پر مشتمل ٹی ٹوئنٹی سیریز کھیلی جائے گی، جو نہ صرف عالمی ایونٹ سے قبل کھلاڑیوں کو اپنی صلاحیتیں جانچنے کا موقع دے گی بلکہ شائقینِ کرکٹ کے لیے بھی ایک بڑا مقابلہ ثابت ہوگی۔
یہ سیریز عالمی سطح پر پاکستان میں بین الاقوامی کرکٹ کے تسلسل اور اعتماد کا مظہر بھی سمجھی جا رہی ہے، جس سے ملک میں کرکٹ سرگرمیوں کو مزید فروغ ملے گا۔
تفصیلات کے مطابق پاکستان اور آسٹریلیا کے درمیان ٹی ٹوئنٹی سیریز کا آغاز 29 جنوری کو ہوگا، جبکہ دوسرا میچ 31 جنوری اور تیسرا اور آخری ٹی ٹوئنٹی یکم فروری کو کھیلا جائے گا۔ تینوں میچز لاہور کے قذافی اسٹیڈیم میں منعقد ہوں گے، جہاں مقابلے شام 6 بجے شروع کیے جائیں گے۔
پاکستان کرکٹ بورڈ کے مطابق آسٹریلوی ٹی ٹوئنٹی اسکواڈ 28 جنوری بروز بدھ لاہور پہنچے گا۔ یہ دورہ مارچ 2022 کے بعد آسٹریلیا کا پاکستان کا تیسرا دورہ ہوگا، پی سی بی حکام کے مطابق سیریز کے تمام انتظامات مکمل کر لیے گئے ہیں تاکہ کھلاڑیوں اور شائقین کو بہترین سہولیات فراہم کی جا سکیں۔
ورلڈ کپ کی تیاری اور پی سی بی کا مؤقف
یہ ٹی ٹوئنٹی سیریز آئندہ ماہ ہونے والے آئی سی سی مینز ٹی ٹوئنٹی ورلڈ کپ 2026 کی تیاریوں کا اہم مرحلہ سمجھی جا رہی ہے۔ پاکستان ورلڈ کپ میں گروپ اے جبکہ آسٹریلیا گروپ بی میں شامل ہے، جس کے باعث دونوں ٹیمیں بھرپور تیاری کے ساتھ میدان میں اتریں گی۔
پی سی بی کے چیف آپریٹنگ آفیسر سمیر احمد کا کہنا ہے کہ آسٹریلیا جیسی مضبوط ٹیم کی میزبانی پر ہم پُرجوش ہیں، یہ سیریز نہ صرف قومی ٹیم کے لیے مفید ہوگی بلکہ پاکستانی شائقین کے لیے بھی سال کا شاندار آغاز ثابت ہوگی۔
