کراچی کے پوش علاقے ڈیفنس میں ایک نوجوان لڑکی کی پھندا لگی لاش ملنے کے دلخراش واقعے نے شہر بھر میں تشویش کی لہر دوڑا دی ہے۔ پولیس کے مطابق خاتون کی شناخت زینب کے نام سے ہوئی ہے جو چند ہفتے قبل ہی رشتۂ ازدواج میں منسلک ہوئی تھیں۔ ابتدائی طور پر معاملہ خودکشی تصور کیا جا رہا تھا تاہم شواہد مشکوک ہونے پر پولیس نے ہر پہلو سے تفتیش شروع کر دی ہے، جبکہ پوسٹ مارٹم رپورٹ کے بعد ہی اصل حقائق سامنے آئیں گے۔
تفصیلات کے مطابق پولیس کا بتانا ہے کہ زینب زوجہ زین عمر کی پھندا لگی لاش ڈیفنس فیز 5 بدر کمرشل کے فلیٹ سے ملی ہے۔ابتدائی طور پر واقعہ خودکشی لگ رہا تھا تاہم مزید تفتیش کے دوران خودکشی کا معاملہ مشکوک لگ رہا ہے، لاش کا پوسٹ مارٹم ہونے کےبعد صورتحال واضح ہوگی۔ پولیس کے مطابق لڑکی کا تعلق سیالکوٹ سے ہے اور اس کی ایک ماہ قبل شادی ہوئی تھی، شادی کے بعد لڑکی اپنے شوہر کی خالہ کے گھر رہائش پذیر تھی جبکہ واقعے کے وقت شوہر گھر پر موجود نہیں تھا۔ پولیس کا بتانا ہے کہ متوفی خاتون کا شوہر سکیورٹی ادارے کا ملازم ہے، معاملے کی ہر پہلو سے تحقیقات شروع کر دی ہے۔
