ریاض میں کنگ عبدالعزیز فالکنری فیسٹیول کا آغاز ہو گیا ہے، جو دنیا بھر میں باز رکھنے کے شوقین افراد کے لیے سب سے بڑا اور باوقار ایونٹ سمجھا جاتا ہے۔ سعودی فالکنز کلب کے زیرِ اہتمام یہ میلہ نہ صرف فالکنری کے قدیم ورثے کو زندہ رکھے ہوئے ہے بلکہ عالمی سطح پر سعودی عرب کی ثقافتی شناخت کو بھی مضبوط بنا رہا ہے۔
ریاض کے شمال میں ملہم کے مقام پر واقع سعودی فالکنز کلب کے ہیڈ کوارٹر میں شروع ہونے والا یہ فیسٹیول گزشتہ چھ برس سے مسلسل منعقد ہو رہا ہے۔ اب تک اس میں حصہ لینے والے بازوں کی مجموعی تعداد 16 ہزار 600 سے تجاوز کر چکی ہے، جس کی وجہ سے اسے دنیا کا سب سے بڑا فالکنری فیسٹیول قرار دیا جاتا ہے۔ ہر سال اس ایونٹ میں شرکت کرنے والے فالکنرز اور مقابلوں کی تعداد میں نمایاں اضافہ دیکھا جا رہا ہے۔
فالکنری ورثے کا عالمی مظاہرہ
میلے میں شامل مقابلوں کی کیٹگریز میں بھی وقت کے ساتھ وسعت آئی ہے، جس سے فالکنری کے قدیم مگر زندہ فن کو فروغ مل رہا ہے۔ یہ فیسٹیول سعودی عرب سمیت دنیا بھر سے آنے والے فالکنرز کو ایک ایسا پلیٹ فارم فراہم کرتا ہے جہاں وہ اپنی مہارت کا مظاہرہ کر سکتے ہیں اور جدید تقاضوں سے ہم آہنگ ہو سکتے ہیں۔
انعامی رقوم میں مسلسل اضافہ بھی اس میلے کی ایک نمایاں خصوصیت ہے۔ 2019 میں انعامات کی مجموعی مالیت ایک کروڑ 70 لاکھ ریال تھی، جو 2025 میں بڑھ کر 3 کروڑ 80 لاکھ ریال سے تجاوز کر گئی ہے۔ اس اضافے سے سعودی فالکنز کلب کے فالکنری کے فروغ اور مقابلوں کی حوصلہ افزائی کے عزم کا اظہار ہوتا ہے۔
انعامی رقوم اور شرکت میں اضافہ
بازوں کی شرکت میں بھی واضح اضافہ ہوا ہے۔ 2019 میں مقابلوں میں 1723 باز شامل ہوئے تھے، جبکہ 2024 میں یہ تعداد ریکارڈ 3322 تک پہنچ گئی۔ 2020 سے 2023 تک ہر سال شرکت میں اتار چڑھاؤ کے باوجود مجموعی رجحان مسلسل اضافے کی جانب رہا، جو مقامی اور عالمی دلچسپی کی عکاسی کرتا ہے۔
اسی طرح مقابلوں کے راؤنڈز کی تعداد بھی بڑھتی رہی ہے۔ 2019 میں 53 راؤنڈز ہوئے تھے، جبکہ جاری فیسٹیول میں 139 راؤنڈز منعقد کیے جا رہے ہیں۔ یہ اضافہ نوجوان فالکنرز، بازوں کے مالکان اور اس فن کو بطور مشغلہ اپنانے والوں کی بڑھتی ہوئی تعداد کا نتیجہ ہے۔
گنیز ریکارڈ اور عالمی شناخت
کنگ عبدالعزیز فالکنری فیسٹیول نے بازوں کی بڑی تعداد میں شرکت پر تین بار گنیز ورلڈ ریکارڈ اپنے نام کیے ہیں، جس سے اس کی عالمی ساکھ مزید مضبوط ہوئی ہے۔ یہ میلہ خلیجی ممالک کے علاوہ دنیا بھر کے فالکنرز کے لیے کشش کا مرکز بن چکا ہے۔
یہ فیسٹیول 10 جنوری 2026 تک جاری رہے گا، جس میں 9 مختلف ممالک سے آنے والے فالکنرز شرکت کر رہے ہیں۔ یہ ایونٹ نہ صرف فالکنری کے شعبے میں ترقی کی علامت ہے بلکہ سعودی عرب کو عالمی فالکنری مرکز کے طور پر بھی نمایاں کرتا ہے۔
