پنجاب اور خیبر پختونخوا کے گھریلو صارفین مشکل میں، سوئی ناردرن گیس کمپنی (ایس این جی پی) نے سردیوں کا گیس لوڈشیڈنگ شیڈول جاری کر دیا، جس کے مطابق شہری دن کے مختلف اوقات میں ہی گیس حاصل کر سکیں گے۔
سردیوں میں گیس کی بڑھتی ہوئی مانگ کے باوجود، حکومت نے صارفین کو مکمل سہولت دینے کی بجائے محدود شیڈول جاری کیا ہے، جس سے عوام کو کھانا پکانے، ناشتہ بنانے اور گھروں کو گرم رکھنے میں مشکلات کا سامنا ہوگا۔
دسمبر تا فروری کے لیے جاری شیڈول کے مطابق صبح ساڑھے 5 بجے سے ساڑھے 8 بجے تک، دوپہر میں ساڑھے 11 بجے سے ڈیڑھ بجے تک اور شام میں ساڑھے 5 بجے سے ساڑھے 8 بجے تک ہی گیس دستیاب ہوگی۔ صنعتی شعبے کے لیے لوڈشیڈنگ نہیں کی جائے گی، لیکن گھریلو صارفین کو محدود اوقات پر انحصار کرنا ہوگا۔
SNGP حکام کا کہنا ہے کہ سسٹم میں گیس موجود ہے اور کوئی کمی نہیں ہے، مگر مہنگائی اور محدود دستیابی کے پیش نظر صارفین کو صرف ضرورت کے مطابق گیس استعمال کرنی چاہیے۔ عوامی حلقوں کا کہنا ہے کہ سردیوں میں یہ پابندیاں شہریوں کو سردی میں مشکلات کا سامنا کرنے پر مجبور کر رہی ہیں۔
