کراچی میں اینٹی نارکوٹکس فورس (اے این ایف) نے بروقت کارروائی کرتے ہوئے بندرگاہ پر منشیات سمگلنگ کی ایک بڑی اور خطرناک کوشش ناکام بنا دی۔ کارروائی کے دوران ایک درآمد شدہ کنٹینر سے 47 کلوگرام کوکین برآمد کی گئی۔
اے این ایف کے مطابق کوکین کی یہ مقدار اب تک ضبط کی جانے والی سب سے بڑی کھیپ ہے، جس کی عالمی منڈی میں مالیت لاکھوں ڈالرز بتائی جا رہی ہے۔ حکام کے مطابق یہ کامیابی ادارے کی پیشہ ورانہ مہارت کا واضح ثبوت ہے۔
انٹیلی جنس معلومات اور رسک اسیسمنٹ کی بنیاد پر سکریپ کے سات درآمدی کنٹینرز کو مشکوک قرار دیا گیا تھا۔ ان کنٹینرز کو گوجرانوالہ منتقل کرنے سے قبل تفصیلی اور باریک بینی سے تلاشی لی گئی۔
تلاشی کے دوران ایک کنٹینر کے اندر کوکین انتہائی مہارت سے چھپائی گئی پائی گئی، جسے اے این ایف کی تربیت یافتہ ٹیم نے بروقت برآمد کر لیا۔ حکام کا کہنا ہے کہ اس طرح کی خفیہ اسمگلنگ جدید طریقوں سے کی جا رہی تھی۔
اینٹی نارکوٹکس فورس کے مطابق ادارہ سمندری بندرگاہوں، ڈرائی پورٹس، شاہراہوں، بین الصوبائی راستوں اور ہوائی اڈوں پر مؤثر نگرانی کر رہا ہے۔ اے این ایف نے واضح کیا کہ ملک سے منشیات کے مکمل خاتمے تک کارروائیاں بلاامتیاز جاری رہیں گی۔
