ایشیا کپ کے فائنل میں بھارت نے دلچسپ مقابلے کے بعد پاکستان کو 5 وکٹوں سے شکست دے دی، بھارت نے 147 رنز کا ہدف 2 گیند پہلے پانچ وکٹوں کے نقصان پر حاصل کیا۔
تفصیلات کے مطابق دبئی اسٹیڈیم میں کھیلے گئے میچ میں ٹاس ایک بار پھر بھارت کے حق میں رہا، ٹاس کے بعد دونوں ٹیموں نے ہاتھ نہیں ملایا تاہم ایک منفرد تبدیلی نظر آئی، جس کے تحت پاکستانی کپتان سے پاکستانی کمنٹیٹر اور سوریا کمار سے بھارتی کمنٹیٹر نے بات کی۔ پاکستان نے 19.1 اوور میں 146 رنز بنائے اور بھارت کو جیت کیلیے 147 رنز کا ہدف دیا۔
صاحبزادہ فرحان 57 اور فخر زمان 46 کے ساتھ نمایاں بلے باز رہے جبکہ 8 کھلاڑی ڈبل فیگر میں بھی داخل نہ ہوسکے۔ صائم ایوب نے 14 جبکہ سلمان آغا 8 اور محمد نواز 6 رنز بناسکے۔ بھارت کے کلدیپ یادو نے 4، بمراہ، ورون چکرورتی اور اکثر پٹیل نے 2، 2 کھلاڑیوں کو شکار بنایا۔
بھارت کی جانب سے ابھیشیک شرما اور شبمن گل نے بیٹنگ کا آغاز کیا، 20 رنز پر تین اہم کھلاڑی آؤٹ ہوئے تو سنجو سیمسن اور تلک ورما نے شاندار انداز سے بیٹنگ کرتے ہوئے 57 رنز کی شراکت داری قائم کی۔ پھر سنجو سیمسن 24 کے انفرادی اسکور پر آؤٹ ہوگئے۔ اس کے بعد شیوام دوبے نے تلک ورما کا بھرپور ساتھ دیا اور دونوں نے شاندار انداز سے بیٹنگ کرتے ہوئے 60 رنز کی پارٹنر شپ قائم کی، پھر دوبے 33 رنز بناکر آؤٹ ہوئے۔
بھارت کی جانب سے تلک ورما 69 رنز کے ساتھ ناقابل شکست رہے جبکہ پاکستان کی جانب سے فہیم اشرف نے تین، شاہین آفریدی اور ابرار نے ایک ایک وکٹ حاصل کی۔ پاکستان کے سب سے مہنگے بولر حارث رؤف ثابت ہوئے جنہوں نے 3.4 اوورز میں 13.63 کی اوسط سے 50 رنز دیے اور کوئی وکٹ حاصل نہیں کی۔
