اسرائیل نے صرف 52 دنوں میں غزہ میں جنگ بندی معاہدے کی 591 مرتبہ خلاف ورزی کی، جس کے نتیجے میں 347 فلسطینی شہید اور 889 زخمی ہوئے۔ یہ اعداد وشمار الجزیرہ کی تازہ رپورٹ میں سامنے آئے۔ رپورٹ کے مطابق 10 اکتوبر 2025 کو غزہ میں جنگ بندی کے اعلان کے بعد اسرائیلی حملے تقریباً روزانہ جاری رہے۔
غزہ کے سرکاری میڈیا آفس کے مطابق 10 اکتوبر سے 29 نومبر تک اسرائیل نے فضائی حملوں، توپ خانے اور براہ راست فائرنگ کے ذریعے مجموعی طور پر 591 خلاف ورزیاں کیں۔ دفتر نے بتایا کہ اسرائیلی فورسز نے فلسطینی شہریوں پر 164 مرتبہ فائرنگ کی، 25 بار “یلو لائن” سے باہر رہائشی علاقوں کو نشانہ بنایا، 280 مرتبہ بمباری اور گولہ باری کی، جبکہ 118 حملوں میں املاک تباہ کی گئیں۔ اس دوران اسرائیل نے غزہ میں سے 35 فلسطینیوں کو حراست میں بھی لیا۔
رپورٹ میں مزید بتایا گیا کہ اسرائیل نے گزشتہ ڈیڑھ ماہ میں نہ صرف حملے جاری رکھے بلکہ انسانی امداد کی ترسیل روکنے، گھروں کی تباہی، اور بنیادی ڈھانچے کو نقصان پہنچانے کا لائحہ عمل بھی برقرار رکھا۔ جنگ بندی معاہدے کے مطابق غزہ میں جنگ کا مکمل خاتمہ، امداد کی بلا روک ٹوک فراہمی، فلسطینی قیدیوں کی رہائی اور اسرائیلی فوج کا “یلو لائن” سے انخلا شامل تھا۔
13 اکتوبر کو مصر، قطر اور ترکی کی ثالثی میں امریکی صدر ڈونلڈ ٹرمپ کی نگرانی میں تقریباً 30 ممالک کے نمائندوں کی موجودگی میں جنگ بندی معاہدے پر دستخط کیے گئے تھے۔ تاہم معاہدے کے باوجود اسرائیل نے فلسطینی ریاست کے قیام کی اجازت دینے سے انکار کیا ہے، جبکہ امریکا نے غزہ کے مستقبل پر صرف مبہم موقف ہی اختیار کیا۔
الجزیرہ کے مطابق جنگ بندی کے بعد 52 میں سے 41 دن غزہ پر حملے ریکارڈ کیے گئے، جبکہ صرف 11 دن ایسے تھے جن میں کوئی حملہ یا جانی نقصان رپورٹ نہیں ہوا۔ اس کے باوجود امریکا کا کہنا ہے کہ غزہ میں جنگ بندی “برقرار” ہے۔
جنگ بندی کی ایک اہم شرط غزہ کو مکمل انسانی امداد کی فراہمی تھی، لیکن ورلڈ فوڈ پروگرام (WFP) کے مطابق اس وقت خوراک کی صرف نصف مطلوبہ مقدار پہنچ رہی ہے۔ فلسطینی امدادی اداروں کے اتحاد کے مطابق کل امداد طے شدہ سطح کے صرف ایک چوتھائی کے برابر ہے۔
UN2720 Monitoring & Tracking Dashboard کے مطابق 10 اکتوبر سے 29 نومبر تک صرف 6,102 امدادی ٹرک غزہ کے اندر اپنی منزلوں تک پہنچ سکے۔
