لاہور: (ویب ڈیسک) چین کے محققین نے طبی ٹیکنالوجی کے میدان میں ایک بڑی کامیابی حاصل کرتے ہوئے ریٹینا کی نہایت حساس سرجری انجام دینے والا جدید خودکار روبوٹ تیار کر لیا ہے، جسے آنکھوں کے علاج میں مستقبل کی ایک انقلابی پیش رفت قرار دیا جا رہا ہے۔
رپورٹس کے مطابق یہ جدید روبوٹ چین کی اکیڈمی آف سائنسز کے انسٹی ٹیوٹ آف آٹومیشن کے ماہرین نے تیار کیا ہے، جو آنکھ کی انتہائی نازک ساخت کو مدنظر رکھتے ہوئے ڈیزائن کیا گیا ہے تاکہ سرجری کے دوران کسی بھی ممکنہ نقصان سے بچا جا سکے۔
تحقیقی ٹیم کے مطابق یہ روبوٹ ریٹینا سے جڑی بیماریوں کے علاج کے لیے سب ریٹینل اور انٹراویسکولر انجیکشنز لگانے کی مکمل صلاحیت رکھتا ہے۔ جانوروں پر کیے گئے تجربات میں اس روبوٹک نظام نے 100 فیصد کامیابی کے ساتھ انجیکشنز انجام دیے، جو دستی سرجری کے مقابلے میں نمایاں بہتری ظاہر کرتا ہے۔
ماہرین کے مطابق آنکھ کی سرجری خصوصاً ریٹینا کی جراحی ایک انتہائی حساس عمل ہے، کیونکہ آنکھ کا حجم چھوٹا اور بافتیں نہایت نرم ہوتی ہیں، جہاں معمولی غلطی بھی مستقل بینائی کے نقصان کا باعث بن سکتی ہے۔ اسی چیلنج کو حل کرنے کیلئے روبوٹ میں ڈی تھری اسپیشل پرسیپشن، انتہائی درست پوزیشننگ اور جدید ٹریکٹری کنٹرول الگورتھمز شامل کیے گئے ہیں۔
روبوٹک میڈیکل ٹیکنالوجی میں انقلابی قدم قرار
مطالعے میں بتایا گیا کہ مصنوعی آنکھوں کے ماڈلز، ایکس وائیوو سور کی آنکھوں اور زندہ جانوروں پر کیے گئے تجربات کے دوران یہ روبوٹ دستی سرجری کے مقابلے میں اوسط پوزیشننگ کی غلطیوں کو تقریباً 80 فیصد جبکہ سرجن کے زیرِ کنٹرول روبوٹک سرجری کے مقابلے میں 55 فیصد تک کم کرنے میں کامیاب رہا۔
یہ اہم تحقیق عالمی شہرت یافتہ سائنسی جریدے سائنس روبوٹکس میں شائع کی گئی ہے، جسے ماہرین مستقبل میں آنکھوں کی سرجری، ریٹینا علاج اور روبوٹک میڈیکل ٹیکنالوجی میں ایک انقلابی قدم قرار دے رہے ہیں۔
