کولمبو: آئی سی سی ٹی ٹوئنٹی ورلڈکپ کے افتتاحی میچ میں پاکستان نے نیدرلینڈز کو شکست دے کر ایونٹ کا شاندار اور فاتحانہ آغاز کر دیا۔ کولمبو کے سنہالیز اسپورٹس کمپلیکس میں کھیلے گئے اس میچ میں قومی ٹیم نے ہدف 19.3 اوورز میں سات وکٹوں کے نقصان پر حاصل کر کے دو اہم پوائنٹس اپنے نام کر لیے۔
پاکستان نے میچ کا آغاز محتاط انداز میں کیا، تاہم ابتدائی اوورز میں وکٹیں گرنے کے باعث ٹیم دباؤ میں نظر آئی۔ ایک موقع پر پاکستان کی سات وکٹیں 114 رنز پر گر چکی تھیں، جس سے میچ نیدرلینڈز کے حق میں جاتا دکھائی دے رہا تھا۔
ایسے نازک وقت میں آل راؤنڈر فہیم اشرف نے غیر معمولی اعتماد اور جارحانہ انداز کا مظاہرہ کرتے ہوئے ٹیم کو سہارا دیا۔ فہیم اشرف نے صرف 11 گیندوں پر 29 رنز کی برق رفتار اننگز کھیلی، جس میں فیصلہ کن شاٹس شامل تھے۔
فہیم اشرف کی اس دلیرانہ بیٹنگ نے نہ صرف اسکور بورڈ کو متوازن کیا بلکہ ٹیم کا حوصلہ بھی بلند رکھا۔ ان کے ساتھ شاہین شاہ آفریدی 5 رنز بنا کر ناٹ آؤٹ رہے اور پاکستان کو کامیابی کی لکیر پار کروائی۔
ابتدائی بیٹنگ میں مشکلات، مڈل آرڈر ناکام
پاکستان کی جانب سے اوپنر صاحبزادہ فرحان نے سب سے زیادہ 47 رنز اسکور کیے اور ٹیم کو مناسب آغاز فراہم کرنے کی کوشش کی۔ صائم ایوب نے 24 رنز بنائے، تاہم وہ اپنی اننگز کو بڑی اسکور میں تبدیل نہ کر سکے۔
سابق کپتان بابر اعظم 15 رنز بنا کر آؤٹ ہوئے، جبکہ کپتان سلمان علی آغا 12 رنز ہی بنا سکے۔ مڈل آرڈر میں شاداب خان صرف 8 رنز پر پویلین لوٹ گئے، جس سے دباؤ میں مزید اضافہ ہو گیا۔
محمد نواز اور عثمان خان کھاتہ کھولے بغیر آؤٹ ہوئے، جس کے باعث پاکستان کی بیٹنگ لائن مشکلات کا شکار رہی۔ تاہم فہیم اشرف کی جارحانہ بیٹنگ نے تمام خدشات ختم کر دیے۔
نیدرلینڈز کی جانب سے آریان دت اور پال وین میکران نے دو، دو وکٹیں حاصل کر کے پاکستانی بیٹنگ کو دباؤ میں رکھا، جبکہ وینڈر مروا، لوگن وین بیک اور کائل کلین نے ایک، ایک وکٹ حاصل کی۔
نیدرلینڈز کی بیٹنگ، ہدف قابلِ حصول مگر ناکافی
اس سے قبل پاکستان نے ٹاس جیت کر نیدرلینڈز کو پہلے بیٹنگ کی دعوت دی تھی۔ نیدرلینڈز کی ٹیم مقررہ اوورز پورے نہ کر سکی اور 19.5 اوورز میں 147 رنز بنا کر آل آؤٹ ہو گئی۔
نیدرلینڈز کی جانب سے کپتان اسکاٹ ایڈورڈز نے سب سے زیادہ 37 رنز بنائے، جبکہ باس ڈی لیڈ نے 30 رنز کی مزاحمتی اننگز کھیلی۔ مائیکل لیوٹ 24 اور کولن ایکر مین 20 رنز بنا سکے۔
دیگر بلے بازوں میں میکس او ڈاؤد 5، زیک لائن کیشے 9، وینڈر مروا 4 اور آریان دت 13 رنز بنا سکے، جبکہ پال وین میکران اور لوگن وین بیک صفر پر آؤٹ ہوئے۔
پاکستانی بولرز نے منظم اور مؤثر بولنگ کا مظاہرہ کیا۔ سلمان مرزا نے 3 وکٹیں حاصل کیں، جبکہ محمد نواز، صائم ایوب اور ابرار احمد نے دو، دو کھلاڑیوں کو پویلین کی راہ دکھائی۔ شاہین شاہ آفریدی نے ایک وکٹ حاصل کی۔
