فیصل آباد: محکمہ زراعت کے ماہرین زراعت نے میدانی علاقوں میں خزاں کیلئے آلو کی کاشت فوری شروع کرنے کی ہدایت کی ہے اور کہاہے کہ کاشتکار31 اکتوبر تک مذکورہ کاشت مکمل کرلیں۔ انہوں نے بتایاکہ آلو پاکستان کی ایک اہم فصل ہے، اس سے فی ایکڑ آمدنی اورغذائیت دوسری فصلوں سے زیادہ ہوتی ہے۔ انہوں نے بتایاکہ پنجاب میں آلو کی تین فصلیں کاشت کی جاتی ہیں جن میں میدانی علاقوں میں دو فصلیں موسم بہاروموسم خزاں اورپہاڑی علاقوں میں ایک فصل موسم گرما میں کاشت ہوتی ہے۔
انہوں نے کہاکہ آلو میں نشاستہ، وٹامن، معدنی نمکیات، لحمیات پائے جاتے ہیں اسلئے یہ ایک مکمل غذا بھی ہے۔ انہوں نے کہاکہ وطن عزیز کی بڑھتی ہوئی آبادی کی غذائی ضروریات کو پورا کرنے کیلئے اورگندم پردباؤ میں کمی لانے کیلئے آلوکی کاشت ازحد ضروری ہے جسے ساحل سمندر سے لیکرپہاڑو ں کی بلند چوٹیوں تک کاشت کیا جا سکتاہے۔ انہوں نے بتایاکہ آلوکی سفید اقسام میں ڈایامنٹ، سانتے، بادشاہ، سلیمی، میلوڈی، چپس کیلئے استعمال ہونے والے آلو کی اقسام میں ہرمس، سٹرنا، لیٹونا، سرخ اقسام میں ایسٹر یکس، کروڈا، برنا،سمپلی ریڈوغیرہ شامل ہیں۔
