اسلام آباد : امریکا نے پاکستان کے ساتھ ہونے والی مشترکہ فوجی مشق “انسپائرڈ گیمبٹ 2026” کو دونوں ممالک کے درمیان دفاعی تعلقات میں ایک نئی جہت قرار دیا ہے۔ یہ بات امریکی سینٹرل کمانڈ (US Central Command) کی جانب سے جاری کردہ بیان میں کہی گئی ہے۔
امریکی سینٹرل کمانڈ کے آفیشل ایکس (سابق ٹوئٹر) اکاؤنٹ پر جاری بیان کے مطابق، امریکا اور پاکستان کی افواج نے 8 سے 16 جنوری تک نیشنل کاؤنٹر ٹیررازم سینٹر پبی میں منعقد ہونے والی انسپائرڈ گیمبٹ مشق کے دوران مشترکہ تربیت مکمل کی۔
مشترکہ فوجی مشق کے دوران انفنٹری کی مشترکہ مہارتوں، جدید جنگی حکمت عملیوں اور انسداد دہشت گردی آپریشنز پر خصوصی توجہ دی گئی۔ تربیتی سرگرمیوں کا مقصد دونوں افواج کی پیشہ ورانہ صلاحیتوں میں اضافہ اور عملی تعاون کو فروغ دینا تھا۔
بیان کے مطابق یہ مشترکہ مشق دونوں ممالک کی افواج کے درمیان باہمی اعتماد، ہم آہنگی، عملی تعاون اور دیرینہ دفاعی تعلقات کو مزید مضبوط بنانے کا باعث بنی۔ انسپائرڈ گیمبٹ 2026 اس دوطرفہ تربیتی سلسلے کی 13ویں مشق ہے، جو 1995 سے مسلسل جاری ہے۔
