اسلام آباد (سی این پی) سپیکر قومی اسمبلی سردار ایاز صادق سے پاکستان میں چین کے سفیر جیانگ ژائی ڈونگ نے ملاقات کی، جس میں پاک چین دوستی کے فروغ کے ساتھ ساتھ اہم علاقائی اور عالمی امور پر تفصیلی تبادلہ خیال کیا گیا۔
ملاقات کے دوران سپیکر قومی اسمبلی سردار ایاز صادق نے کہا کہ چین پاکستان کا قریبی، قابلِ اعتماد اور آزمائش کی ہر گھڑی میں ساتھ نبھانے والا دوست ملک ہے، جس نے ہمیشہ پاکستان کا بھرپور ساتھ دیا ہے۔
انہوں نے کہا کہ پاکستان کو چین کے ساتھ اپنی سدا بہار دوستی پر فخر ہے، جبکہ دونوں ممالک کے درمیان اقتصادی اور دفاعی شعبوں میں قریبی تعاون قابلِ ستائش اور باہمی اعتماد کا مظہر ہے۔
سردار ایاز صادق کا کہنا تھا کہ پاک چین دوستی باہمی احترام اور اعتماد کی مضبوط بنیادوں پر قائم ہے، اور پاکستان و چین خطے میں ایک دوسرے کے اسٹریٹجک شراکت دار ہیں۔
انہوں نے مزید کہا کہ دونوں ممالک ہر مشکل وقت میں ایک دوسرے کے شانہ بشانہ کھڑے رہے ہیں، جبکہ پاک چین دفاعی تعاون خطے میں پائیدار امن کے قیام کیلئے اہم کردار ادا کر رہا ہے۔
سپیکر قومی اسمبلی نے کہا کہ ان کی گزشتہ سپیکر شپ کے دوران چینی صدر شی جن پنگ کا پاکستان کی پارلیمنٹ کے مشترکہ اجلاس سے خطاب ایک تاریخی اور یادگار موقع تھا۔
اس موقع پر چینی سفیر جیانگ ژائی ڈونگ نے سپیکر قومی اسمبلی کے چین سے متعلق مثبت جذبات کو سراہتے ہوئے کہا کہ دونوں ممالک کے عوام ایک مضبوط دوستی کے رشتے میں بندھے ہوئے ہیں۔
آخر میں سپیکر سردار ایاز صادق نے کہا کہ پاک چین اسٹریٹجک شراکت داری ہر گزرتے دن کے ساتھ مزید مضبوط ہوتی جا رہی ہے۔
