ملکی صرافہ مارکیٹ میں آج سونے کی فی تولہ قیمت میں مزید 21 ہزار 500 روپے کی بڑی کمی ریکارڈ کی گئی ہے، جس کے بعد سونے کے نئے نرخ کم ہو کر 4 لاکھ 90 ہزار 362 روپے فی تولہ کی سطح پر آ گئے ہیں۔ اس تازہ کمی کے ساتھ ہی گزشتہ دو دنوں میں ہونے والی گراوٹ کو شامل کیا جائے تو تین دن کے دوران مجموعی طور پر سونے کی قیمت میں 82 ہزار 500 روپے کی تاریخی کمی واقع ہو چکی ہے، جس نے مارکیٹ میں شدید بے چینی اور ہلچل پیدا کر دی ہے۔
چاندی کی قیمت میں بھی نمایاں کمی ریکارڈ کی گئی ہے، جہاں فی تولہ چاندی 602 روپے سستی ہو کر 8 ہزار 405 روپے کی سطح پر آ گئی ہے۔ صرافہ مارکیٹ سے وابستہ افراد کے مطابق قیمتی دھاتوں میں اس قدر تیز گراوٹ نے سرمایہ کاروں اور تاجروں کو محتاط رویہ اختیار کرنے پر مجبور کر دیا ہے۔
عالمی مارکیٹ میں بھی سونے کی قیمتوں میں ریکارڈ کمی دیکھی گئی ہے، جہاں تین دن کے دوران فی اونس سونے کے نرخ میں مجموعی طور پر 825 ڈالر کی کمی ہوئی ہے۔ آج عالمی سطح پر سونا مزید 215 ڈالر سستا ہونے کے بعد 4 ہزار 676 ڈالر فی اونس کی سطح پر آ گیا ہے، جس کے اثرات براہِ راست مقامی مارکیٹ پر بھی مرتب ہوئے ہیں۔
سونے کے ساتھ ساتھ دیگر عالمی مالیاتی اثاثوں میں بھی مندی کا رجحان دیکھا جا رہا ہے۔ عالمی مارکیٹ میں بٹ کوائن کی قیمت 77 ہزار ڈالر سے بھی نیچے آ گئی ہے، جہاں ایک ہفتے کے دوران اس کی قدر میں 13 فیصد سے زائد کمی ریکارڈ کی گئی۔ گزشتہ چھ ماہ میں بٹ کوائن اپنی بلند ترین سطح ایک لاکھ 26 ہزار ڈالر سے پھسل کر اب تک 49 ہزار ڈالر سے زائد کی مجموعی کمی کا شکار ہو چکا ہے۔
