چین کے سائنسدانوں نے انکشاف کیا ہے کہ چاند پر زلزلوں کی وجہ سے لینڈسلائیڈنگ ہو رہی ہے ، ان کو چاند کی سطح کے سرکنے کے نئے شواہد ملے ہیں۔
سن یات سین یونیورسٹی، فوجو یونیورسٹی اور شنگھائی نارمل یونیورسٹی کے سائنسدانوں کی ایک تحقیق کے مطابق چاند پر 2009ء کے بعد سے اب تک 41 نئی لینڈ سلائیڈنگ کا پتہ چلا ہے جو چاند کے اندرونی زلزلوں کے باعث رونما ہوئیں۔ یہ تحقیق 11 ستمبر کو ’نیشنل سائنس ریویو‘ میں شائع ہوئی ہے۔
تحقیق کے دوران سائنسدانوں نے چاند کے 74 غیر مستحکم علاقوں کی 562 تصاویر کا موازنہ کیا اور ان میں 41 نئی لینڈسلائیڈنگز کی شناخت کی ہے۔ اِن تمام لینڈ سلائیڈنگز میں سے 30 فیصد چاند پر نئے اثرات جبکہ باقی متعدد زلزلوں کے باعث پیدا ہوئیں۔ محققین کا کہنا ہے کہ چاند پر زلزلے، زمین کے زلزلوں کے برعکس کئی گھنٹوں تک جاری رہ سکتے ہیں اور سطح پر موجود ڈھانچوں کو نقصان پہنچا سکتے ہیں۔ یاد رہے کہ چین کا چاند کے جنوبی قطب میں 2035ء تک اپنا تحقیقاتی سٹیشن قائم کرنے کا منصوبہ ہے۔
