گلگت :۔ پاک فوج ایوی ایشن کے ہیلی کاپٹر کے ذریعے ایک زخمی امریکی پیراگلائیڈر کو نگر میں واقع رش جھیل سے ایئرلفٹ کیا گیا۔ تفصیلات کے مطابق 2 پیراگلائیڈرز، 40 سالہ امریکی شہری جیسیکا کورٹنی گرین اور 35 سالہ آسٹریلوی شہری شین اوون ٹائیگ نے ہفتے کے روز کریم آباد، ہنزہ سے اڑان بھری تھی۔
پولیس کے مطابق دونوں پیراگلائیڈرز نے رش جھیل پر لینڈ کرنے کا منصوبہ بنایا تھا، جو کریم آباد سے تقریباً 50 کلومیٹر کے فاصلے پر ہے، تاہم، امریکی پیراگلائیڈر کو ہنگامی طور پر کریش لینڈنگ کرنی پڑی، جس میں ان کی ٹانگ زخمی ہوگئی تھی۔ذرائع کے مطابق ان کی پسلیاں بھی ٹوٹ گئی تھیں اور ٹخنے پر چوٹ آئی تھی اور وہ بے ہوش ہو گئی تھیں، ان کے ساتھی پیراگلائیڈر نے سیٹلائٹ فون کے ذریعے ایک دوست کو اطلاع دی، جس نے مقامی افراد سے ہنگامی مدد طلب کی، ہوپر ویلی کے رضاکار اتوار کو جائے حادثہ پر پہنچے اور زخمی پیراگلائیڈر کو کچھ فاصلے تک نکالنے میں کامیاب ہوئے۔
رضاکار رات بھر کیمپ میں ٹھہرے اور کھانا اور ابتدائی طبی امداد فراہم کی، پیر کی صبح پاک فوج ایوی ایشن کے ہیلی کاپٹر نے زخمی امریکی پیراگلائیڈر کو گلگت اور بعد ازاں اسکردو منتقل کیا، وہاں سے اسی روز انہیں چارٹرڈ فلائٹ کے ذریعے اسلام آباد لے جایا گیا۔ رش جھیل سطح سمندر سے 4 ہزار 694 میٹر کی بلندی پر واقع ہے یہ دنیا کی بلند ترین جھیلوں میں سے ایک ہے، جو میار پیک اور اسپانٹک سے تقریباً 15 کلومیٹر شمال میں واقع ہے، سیاح عام طور پر ہوپر ویلی سے ہوپر گلیشیئر اور میار گلیشیئر عبور کرکے وہاں پہنچتے ہیں۔
