بیجنگ : چین کی معروف ٹیک کمپنی علی بابا نے اپنے مصنوعی ذہانت (اے آئی) ڈیویژن کے تحت ایک اپ گریڈ شدہ جنریٹیو چیٹ بوٹ Qwen متعارف کرا دیا ہے، جس کا مقصد روزمرہ صارفین کے لیے اے آئی ٹیکنالوجی کا استعمال مزید تیز، آسان اور مؤثر بنانا ہے۔ کمپنی کے مطابق یہ نیا ورژن نہ صرف بہتر صلاحیتوں سے مزین ہے بلکہ عالمی سطح پر اوپن سورس ماڈلز کے بڑھتے ہوئے مقابلے میں ایک مضبوط اضافہ بھی ثابت ہو رہا ہے۔
کمپنی نے اعلان کیا ہے کہ Qwenصارفین کے درمیان اے آئی کے استعمال کو مزید وسیع اور تیز کرنے کے لیے تیار کیا گیا ہے۔ کمپنی کے مطابق Qwen کو علی بابا کے انتہائی مقبول اوپن سورس ماڈل کی بنیاد پر تیار کیا گیا ہے، جسے اب تک دنیا بھر میں 600 ملین سے زائد بار ڈاؤن لوڈ کیا جا چکا ہے۔
یہ بھی پڑھیں: سوشل میڈیا اور جعلی اے آئی ویڈیوز، شناخت کے مؤثر طریقے
علی بابا نے بتایا کہ نیا چیٹ بوٹ ایک مکالماتی اور ٹاسک بیسڈ ذاتی اے آئی اسسٹنٹ کے طور پر کام کرے گا، جو مختلف شعبوں میں صارفین کی ضروریات کو مؤثر انداز میں پورا کرنے کی صلاحیت رکھتا ہے۔
حالیہ عالمی سرمایہ کاری مقابلے میں، جہاں چھ مختلف اے آئی ماڈلز شریک تھے، Qwen نے پہلی پوزیشن حاصل کی جبکہ ڈیپ سیک دوسرے نمبر پر رہا۔ کمپنی کا کہنا ہے کہ مصنوعی ذہانت اب صرف انسانوں سے سیکھنے کے مرحلے سے آگے بڑھ کر انسانی معاونت کے دور میں داخل ہو رہی ہے، جہاں Qwen جیسے ٹولز روزمرہ زندگی میں اہم کردار ادا کریں گے۔
علی بابا کے مطابق اس اپ گریڈ شدہ چیٹ بوٹ کو مستقبل میں نقشہ جاتی خدمات، فوڈ ڈیلیوری، سیاحت، آفس ٹولز، آن لائن شاپنگ اور ہیلتھ کیئر سمیت متعدد شعبوں میں شامل کیا جائے گا۔
ٹیک انڈسٹری کے ماہرین کا کہنا ہے کہ چین کی دیگر اے آئی کمپنیاں — کیمی AI، زی پو، اور مینی میکس — بھی تیزی سے اپنے اوپن سورس ماڈلز کے ساتھ آگے بڑھ رہی ہیں، جس کے باعث دنیا بھر میں ایک مضبوط اوپن اے آئی ایکو سسٹم تشکیل پا رہا ہے۔
