پاکستان بھر کے تعلیمی اداروں میں موسمِ سرما کی تعطیلات کا باضابطہ شیڈول جاری کردیا گیا، جس کے تحت سرکاری اور نجی اسکولوں میں چھٹیوں کا دورانیہ مختلف صوبوں میں موسم کی شدت کو دیکھتے ہوئے مقرر کیا گیا ہے۔ والدین اور طلبہ اس شیڈول کے مطابق اپنی منصوبہ بندی کر سکیں گے۔
وزارتِ تعلیم کے اعلامیے کے مطابق بلوچستان کے سرد ترین علاقوں میں 16 دسمبر سے تعطیلات کا آغاز ہوگا، جو ڈھائی ماہ تک جاری رہیں گی۔ یہ شیڈول صوبے کے تمام سرکاری اور نجی اسکولوں پر یکساں طور پر لاگو ہوگا۔
پنجاب میں موسمِ سرما کی تعطیلات 23 دسمبر 2025 سے شروع ہوں گی، جو 11 جنوری 2026 تک جاری رہیں گی۔ تمام تعلیمی ادارے 13 جنوری 2026 کو دوبارہ کھلیں گے، جب کہ نئے تعلیمی سال کا باقاعدہ آغاز بھی اسی دن ہوگا۔
خیبرپختونخوا میں موسم کے مطابق دو مختلف شیڈول جاری کیے گئے ہیں۔
• میدانی علاقوں میں چھٹیاں 22 دسمبر تا 31 دسمبر ہوں گی۔
• پہاڑی اور برفانی علاقوں میں تعطیلات 22 دسمبر سے 29 فروری تک جاری رہیں گی۔
حکومت نے چند روز قبل اسکولوں کے اوقاتِ کار بھی تبدیل کیے تھے تاکہ طلبہ کو شدید سموگ کے اثرات سے محفوظ رکھا جا سکے۔
یومِ قائداعظم کی عام تعطیل
وفاقی حکومت نے سالانہ تعطیلات کا نوٹیفکیشن بھی جاری کر دیا ہے۔ اعلامیے کے مطابق:
• 25 دسمبر 2025 (جمعرات) کو یومِ قائداعظم کے موقع پر ملک بھر میں عام تعطیل ہوگی۔
• 26 دسمبر 2025 (جمعہ) کو مسیحی برادری کے ملازمین کے لیے کرسمس کے بعد کی تعطیل ہوگی۔
