تہران: ایران نے خبردار کیا ہے کہ اگر امریکا نے اس کے خلاف کسی بھی قسم کی فوجی کارروائی کی تو خطے میں موجود امریکی مفادات کو نشانہ بنایا جائے گا۔ ایرانی حکام کے مطابق اس حوالے سے خطے کے متعدد ممالک کو پیشگی طور پر آگاہ کر دیا گیا ہے۔
ایک سینئر ایرانی عہدیدار نے بتایا کہ تہران نے سعودی عرب، متحدہ عرب امارات (یو اے ای) اور ترکیہ سمیت ہمسایہ ممالک کو واضح پیغام دیا ہے۔ پیغام میں کہا گیا ہے کہ اگر ان ممالک میں قائم امریکی فوجی اڈوں سے ایران پر حملہ کیا گیا تو وہ اڈے جوابی کارروائی کی زد میں آ سکتے ہیں۔
ایرانی حکام کا کہنا ہے کہ یہ انتباہ احتیاطی اور دفاعی نوعیت کا ہے۔ اس کا مقصد خطے میں کسی بھی ممکنہ فوجی مہم جوئی کو روکنا ہے۔ ایران نے واضح کیا ہے کہ وہ اپنی خودمختاری اور قومی سلامتی کے تحفظ کے لیے ہر ممکن اقدام کرے گا۔
ایران نے یہ بھی کہا ہے کہ حالیہ داخلی صورتحال کے باوجود ملکی سیکیورٹی ادارے مکمل کنٹرول میں ہیں۔ ایرانی قیادت کے مطابق کسی بھی بیرونی مداخلت کو ہرگز قبول نہیں کیا جائے گا۔ ان کا کہنا ہے کہ خطے میں بڑھتی کشیدگی کی بنیادی وجہ بیرونی دباؤ اور دھمکی آمیز بیانات ہیں۔
