امریکا: دنیا بھر کے ٹیکنالوجی شائقین کیلئے حیران کن خبر سامنے آئی ہے جہاں انٹیل کے طاقتور پروسیسر انٹیل کور آئی 9-14900 کے ایف نے اوورکلاکنگ کی دنیا میں نیا عالمی ریکارڈ قائم کر دیا۔ انتہائی ماہر اوورکلاکر نے پروسیسر کی رفتار 9.2 گیگا ہرٹز تک پہنچا کر سابقہ ریکارڈ توڑ دیا، جس کے بعد ٹیک کمیونٹی میں اس کامیابی کو غیر معمولی قرار دیا جا رہا ہے۔
رپورٹس کے مطابق معروف ایکسٹریم اوورکلاکر “wytiwx” نے انٹیل کے اس ہائی اینڈ پروسیسر کو 9206.34 میگا ہرٹز تک پہنچایا۔ HWBOT کی درجہ بندی میں یہ نتیجہ 16 ہزار سے زائد سبمشنز میں پہلے نمبر پر آ گیا ہے، جبکہ یہ نیا ریکارڈ 15 مئی کو باضابطہ طور پر درج کیا گیا۔
دلچسپ بات یہ ہے کہ یہ کارنامہ نئی Arrow Lake سیریز کے بجائے پرانی مگر طاقتور Raptor Lake آرکیٹیکچر پر مبنی پروسیسر کے ذریعے انجام دیا گیا۔ ماہرین کے مطابق اس کامیابی نے ثابت کر دیا کہ مناسب کولنگ اور جدید ہارڈویئر کے ساتھ موجودہ نسل کے پروسیسرز اب بھی حیران کن کارکردگی دکھا سکتے ہیں۔
ٹیسٹنگ کے دوران ASUS ROG Maximus Z790 Apex مدربورڈ استعمال کیا گیا، جبکہ سسٹم میں 16 جی بی DDR5 ریم اور ASUS ROG THOR 1600W پاور سپلائی شامل تھی۔ ماہرین کا کہنا ہے کہ اس سطح کی اوورکلاکنگ کیلئے انتہائی جدید کولنگ ٹیکنالوجی اور مستحکم پاور مینجمنٹ ضروری ہوتی ہے۔
سابقہ عالمی ریکارڈ بھی انٹیل کے نام تھا
اس سے قبل CPU فریکوئنسی کا عالمی ریکارڈ معروف اوورکلاکر “elmor” کے پاس تھا، جنہوں نے انٹیل کور آئی 9-14900KF (Intel Core i9-14900KF) کے قریبی ماڈل Core i9-14900KS کو 9117.75 میگا ہرٹز تک پہنچایا تھا۔ تاہم اب نئے ریکارڈ نے سابقہ حد کو بھی پیچھے چھوڑ دیا ہے۔
ٹیک ماہرین کے مطابق یہ کامیابی صرف اوورکلاکنگ کمیونٹی کیلئے ہی نہیں بلکہ انٹیل کیلئے بھی اہم سنگ میل سمجھی جا رہی ہے، کیونکہ اس سے کمپنی کے ہائی پرفارمنس پروسیسرز کی صلاحیت مزید نمایاں ہوئی ہے۔
انٹیل نے بھی نئے ریکارڈ کی تصدیق کردی
انٹیل نے اپنے آفیشل Intel Technology اکاؤنٹ کے ذریعے اس کامیابی کو تسلیم کرتے ہوئے اسے نیا CPU Frequency World Record قرار دیا۔ کمپنی کے مطابق اوورکلاکر “wytiwx” نے ASUS ROG Maximus Z790 Apex مدربورڈ پر انٹیل پروسیسر کو 9.2 گیگا ہرٹز سے بھی آگے پہنچایا۔
ماہرین کا کہنا ہے کہ اگرچہ عام صارفین کیلئے اس سطح کی اوورکلاکنگ روزمرہ استعمال میں ممکن نہیں، تاہم اس قسم کے عالمی ریکارڈز مستقبل کے ہائی پرفارمنس کمپیوٹنگ ٹرینڈز اور ہارڈویئر صلاحیتوں کی سمت ضرور متعین کرتے ہیں۔
